कन्हैया झा
अलीनगर प्रखंड क अंटौर गाम स्थित ऐतिहासिक बाबा पंचानाथ महादेव मंदिर म सावन मासक अंतिम सोमवारी पर श्रद्धालु सभक द्वारा पूर्ण भक्तिभाव सं पूजापाठ आ जलाभिषेक कएल गेल। भोरे स मंदिर परिसर शिवभक्त सभक जयकारा सं गूँजि उठल आ दर्शन लेल लंबा पाँति लागल रहल।
स्थानीय गामक संगहि आसपासक गाम सभ सं महिला, पुरुष आ युवा भक्तजन पहुँचि क भगवान शिव क दर्शन कएलनि आ जल चढ़ा क सुख, शांति आ समृद्धिक कामना कएलनि।
पूजापाठक दौरान मंदिर परिसर भजन-कीर्तन, हर-हर महादेवक नारा आ धार्मिक गीत सभ सं भक्तिमय वातावरण बनल रहल। श्रद्धालु सभक लेल जलपान आ प्रसाद वितरणक उत्तम व्यवस्था सेहो कैल गेल छल।
मंदिर समिति आ गामक लोकनिक सक्रिय सहयोग सं कार्यक्रम शांतिपूर्ण ढंग सं सम्पन्न भेल। प्रशासन द्वारा विधि-व्यवस्थाक दृष्टि सं समुचित सुरक्षा व्यवस्था सेहो कएल गेल छल।