समस्तीपुर / खानपुर –:प्रखंड स्थित कस्तूरबा गांधी आवासीय बालिका विद्यालय मसीना मेँ मंगलदिन 9 सऽ 14 वर्षक उमेर वर्गक 42 बच्ची सभ केँ गर्भाशय ग्रीवा कैंसर सऽ बचाव हेतु ह्यूमन पेपिलोमा वायरस (एचपीवी) टीका देल गेल। ई टीका सरकार द्वारा पूर्णतः निःशुल्क रूपेण उपलब्ध कैल जा रहल अछि।टीकाकरण कार्य सामुदायिक स्वास्थ्य केंद्र, खानपुरक प्रभारी चिकित्सा पदाधिकारी डॉ. राणा नितेश कुमार सिंह आओ प्रखंड स्वास्थ्य प्रबंधक राकेश रंजनक उपस्थिति मेँ सम्पन्न भेल। बच्ची सभ केँ टीका देबाक काज एएनएम संध्या कुमारी द्वारा कैल गेल।
एहि अवसर पर विश्व स्वास्थ्य संगठनक मॉनिटर प्रवीण कुमार झा आओ डाटा ऑपरेटर पप्पू कुमार सेहो मौजूद छलाह, जे लाइन लिस्टिंग आओ डाटा संकलनक कार्य केलनि।विद्यालयक प्राचार्य शैलेन्द्र कुमार, हॉस्टलक वार्डन रानी चंदा देवी, आभा कुमारी आओ मंजू कुमारीक उपस्थिति मेँ बच्ची सभ केँ सुरक्षित ढंग सऽ टीका देल गेल। ई टीका सामान्य इंजेक्शन जेकाँ हाथ मेँ देल जाइत अछि आओ सामान्यतः कोनो दुष्प्रभाव नै होइत अछि।स्वास्थ्य विभागक आदेश अनुसार पहिल चरण मेँ 9 सऽ 14 वर्षक बच्ची सभ केँ स्कूल-स्कूल जा कऽ विशेष कैंप लगाकऽ टीका देल जा रहल अछि। आगाँ चलि कऽ एहि उमेर वर्गक सभ बच्ची केँ ई टीका देबाक योजना अछि, जाहि सऽ ओ सभ गर्भाशय ग्रीवा कैंसर जेकाँ गंभीर रोग सऽ बचल रहथि।एहि अभियानक बारे मेँ जनप्रतिनिधि आओ स्वास्थ्य विभागक कर्मी सभ द्वारा व्यापक प्रचार-प्रसार कएल जा रहल अछि, जाहि सऽ अधिक सऽ अधिक बच्ची टीका लगबथि आओ हुनकर स्वास्थ्य भविष्य सुरक्षित बनल रहय।