कन्हैया झा
आज दिनांक 09 अगस्त 2025 (शनिवार) के दिन मध्याह्न 1 बजे स्वामी विवेकानंद सार्वजनिक पुस्तकालय, तुमौल के भूमिपूजन सह शिलान्यास कार्य सम्पन्न भेल। एहि पावन अवसर पर कामेश्वर सिंह दरभंगा संस्कृत विश्वविद्यालय केर पूर्व कुलपति प्रो. डॉ. रामचन्द्र झा द्वारा शिलान्यास कएल गेल। अपने संबोधन मे डॉ. झा वर्तमान समय मे पुस्तकालय निर्माणक महत्व पर जोर दैत कहलनि जे ज्ञानक प्रमुख केन्द्र पुस्तकालय अछि, जकर निर्माण आ सदुपयोग व्यक्ति, समाज आ देश सभक लेल लाभकारी होइत अछि।
समारोहक मुख्य अतिथि महान संत मौनी बाबा रहथि। मौनी बाबा कहलनि जे जखन मंदिर मे जायलासँ सद्बुद्धि प्राप्त होइत अछि, तखन पुस्तकालय मे जायलासँ ज्ञान प्राप्त होइत अछि। हुनकर कथन अनुसार, ज्ञान प्राप्ति भगवान प्राप्तिक समान अछि। विशेष रूप सँ, आज जे मुहुर्त मे ई शिलान्यास भेल, ओहि मुहुर्त मे प्रभु श्रीरामक जन्म सेहो भेल छल।
विशिष्ट अतिथि रूपेँ उपस्थिति रहथि— डॉ. प्रो. प्रेम मोहन मिश्र (वैज्ञानिक), श्री नीतीश प्रभाकर चौधरी,श्री संजय सिंह,श्री विनय पासवान ,श्री सतीशचन्द्र झा (मुखिया)वैज्ञानिक प्रेम मोहन मिश्र कहलनि जे पुस्तकालयक स्थापना समाजक प्रगति लेल अति आवश्यक अछि।
कार्यक्रमक अध्यक्षता श्री दयानाथ झा द्वारा आ मंच संचालन श्री सुनील कुमार झा तथा श्री राघवेन्द्र झा द्वारा कएल गेल। उपस्थित अतिथिक मिथिला परंपरा अनुसार पाग आ चादर सँ सम्मानित कएल गेल।
स्वागत भाषण समिति के संरक्षक डॉ. प्रो. फूलचन्द्र मिश्र “रमण” द्वारा देल गेल, जखनकि मुख्य संरक्षक श्री रामकुमार झा पुस्तकालय शिलान्यास समारोहक विषय प्रवेश करेलनि।
समारोह मे मिथिलांचल केर सुप्रसिद्ध गायिका शिवानी झा, दरभंगा रेडियो स्टेशन केर लोकप्रिय गायक दीपक कुमार झा आ प्रसिद्ध मैथिली गायक रामबिहारी झा अपन गायन सँ दर्शक-श्रोता केँ मंत्रमुग्ध कएलनि।
धन्यवाद ज्ञापन समिति केर महासचिव श्री मृत्युंजय मृणाल द्वारा देल गेल आ कार्यक्रम मे उपस्थिति सभ अतिथि आ आमजनक प्रति आभार व्यक्त कएल गेल।